Berichte

Kletterlager Tessin

Leitung:       Luzia, Felix, Marvin, Bergführer Ueli Frei
Teilnehmer: 12 JO
Bericht:        Ladina Halter

Am Sunntigmorgä hemmer üs ganz gmüätlich für es speziells Herbstlager versammlet. Mer sind nämli us drü Sektione zemegmischlet gsi: d JO Zindelspitz, d JO Einsiedle und d JO Tödi mitm Bergfüährer Ueli. Obwohl mer üs vorher nonig all kennt hend, hemmer guät harmoniert und üs schnell gfundä. Ih drü Autos ufteilt simmer via San Bernadino is Tessin. Z Bellinzona uf de Raststätt hemmer e churzi Pause gmacht und sind denn wiiter, eigentlich Richtig Zeltplatz im Maggiatal, aber plötzli isch en Ahruef cho, die einte Drü seged usversehe bis fast ah die italienisch Grenze abe gfahre...
Ufem TCS-Campingplatz in Gordevio hemmer üs denn ihgrichtet. D Leiter hend ganz gmüätlich im beheizte VWBüssli pfuused während de Ueli und d Teilnehmer im a*chalte Zelt übernachtet hend. 
Die Temperature sind im Lager sowieso immer Thema gsi. De Tag dur bim Chlettere ah de Sunnähäng, hemmer chöne im T-Shirt sii und sobald mer ufem Camping gsi sind hend au die beste Schlafsäck und Daunejagge nüt meh gnützt... Janu, das isch halt so ufme Campingplatz wo im Herbst nur zwei Stund Sunne am Tag hät.
Defür simmer jede Abig mitm me mega feine Esse vum Fabian bechocht wordä. Aso kulinarisch simmer würkli wahnsinnig verwöhnt wordä. Und das nöd nur am Abig, sondern au scho am Morgä. Es hät mal Pancakes geh, mal Milchriis und au Rüehrei mit Speck hät nöd dörfe fehle. Am Abig häts untypischi Lagermenues wie es indischs Curry mit Naanbrot geh. Das isch de Hammer gsi! S nöchst Mal mümmer aber no meh ah de Marroni Vorspiis probiere, die chöge hend sich eifach nöd schelle lah. 
Am Morgä simmer amel öppe am 9i ufbroche zum go chlettere. Am erste Tag simmer in Arcegno gsi, all hend zerst mal wieder müässä is chlettere inecho und es hät en gmüätliche Tag geh. Wommer ali müäd gsi sind, simmer uf Ascona no es feins Gelato go schläckä.
Am Mäntig simmer nomal uf Arcegno, aber dasmal inen andere Sektor. Aso gnau gno ih zwei Sektore, mer hend üs am Morgä ufteilt, sind denn aber nachm Zmittag alli im schwierigere Sektor unterwegs gsi. Und schwieriger ischer nöd gsi nur will d Bohrhöge plötzli entgege cho sind...
Für en feine Znacht muäsme natürli ja go poste und so simmer alli zeme in Coop ine. Die eine hend schnell Langwiile gha und sind mit Seifeblöterli am spiele gsi, oder wie e Entefamilie enand nachegwatschlet. Die wo konzentriert am poste gsi sind, hend aber au e Eeeewigkeit gha. Mer hend denn wos endli cho sind schnell gmacht und alli Ihchäuf samt em Postiwägeli mitgnoh. Das hemmer denn die ganz Wuche als Abwäschtransport bruucht, also tiptop inverstierti zwei Franke würi sege. D Abwäsche isch au immer lustig gsi, meistens sind nöd nur die zwei wo iiteilt gsi sind (dankä Felix für din super Plan =)! ), sondern no paar meh dra gsi, s isch nämli amel richtig lustig gsi.
A Dsischtig simmer denn ane Wand wo letzt Jahr ein Wasserfall gsi isch. Döt hemmers ganz gmüätlich gha. De Pascal hät leider denn müässä abreise. Am Abig häts natürli wieder es Gelato geh für jede. Und nachm Znacht hemmer im halbwegs warme Esszelt no en huufe Spieli gmacht.
Denn isch scho Mittwuch gsi und mer sind anen völlig überfüllte Chlettergarte here, wommer denn zum Glück aber no en schwierigere Uswiichsektor nebet dra gha hend. Döt häts denn en Wettbewerb geh: wer d Route ufechunnt, chunnt es Glacé vum Ueli gsponseret über. Das hemmer natürlich denn grad au müässä ihlöse.
Am Dunnstig simmer in Ponte Brolla gsi go chlettere, das isch eigentli recht bekannt, aber au döte hemmer en weniger bekannte Sektor gnoh und sind denn fast elei gsi. Eigentlich wär de Tag (wie de Mittwuch au) als Pausetag grechnet gsi, aber irgendwie sind denn doch alli motiviert dra gsi. D Aila hemmer bi einere Route bsunders ahgfüüret, aber zuegeh, sie häts au sehr akrobatisch usgseh was sie da veranstaltet hät. Nachdem alli gnueg gchlätteret hend simmer, wie sölls au anderst sii, uf Ascona go üs es Gelato hole. De Abig hemmer au wieder ganz gmüätlich mit feinem Esse und Spiili usklinge lah.
Am letzte Chlettertag simmer in Balladrum verwiiled. De Chlettergarte döte hät e wunderschöni Ussicht uf de See und s Wetter isch bombastisch gsi. Mer hät gmerkt, dass alli langsam müäd sind und niemmer isch so flissig wie ih de letzte Täg meh kletteret. Relativ früäh simmer drum uf Ascona go es Glacé ässä, chli dur d Altstadt schlendere und imne Resti fein Znacht ässä. Zrugg bim Camping hemmer nochli Spiili gmacht, en huufe gschwätzt und sind denn is Bett oder is Zelt. Aso usserd d Céline und d Ladina, die hend scho die ganz Wuche im Büssli gschlafe, ih de Hoffnig dases döt ine bizeli wärmer isch als im Zelt.
Am Samstig hemmer denn gmüätlich Tagwach gmacht und langsam ufgruumet. Endli hemmer au mal d Sunne ufem Campingplatz erlebt. Dena simmer nurno Hei gfahre und scho ischs Lager 2021 verbii gsi.
S isch würkli ganz e cooli Wuche gsi mit allne und dass d Nadine und de Pascal au nur für paar Täg no mitcho sind, hät sich au glohnt! Schad hemmer de Pesche Wühtrich nöd gfunde, defür hemmer jede Tag es Glacé gha! :) 
 

Sponsoren